IRTEERA: Formigal eski estazioa - Portalet aparkalekua (1750m)
ZAILTASUNA: S2. Igotako lekutik jaitsita S1.
DENBORAK:
Igoera: 2 ordu
Jaitsiera 45 minutu
NOLA AILEGATU:
Iruñeatik Jacara joan eta hemendik Formigal eski estaziora joango gara. Formigal eta Pourtaleteko lepoaren artean, justu lepo hau zeharkatu baino metro batzuk lehenago Portalet deitzen den aparkalekua dago. Hor utzi behar da autoa.
Egunsentia bidean, Berdun inguruan
KRONIKA:
Berriz ere elur baldintza justuekin, berriz ere eguraldi iragarpen pattalarekin, arriskatu gabe oraindik itxita dauden eski pisten ondoko mendi bat aukeratu dugu ateraldia egiteko. Azpiko zatia pistetatik eginda eskiak hondatzeko aukera gutxiago, eta lainoa inguruak estaliz gero hauei segituta autora itzultzeko aukera gutxiago, hautua erraza zen beraz.
9:57 : Formigal - Portalet aparkalekua (1750m)
Hitzordua berriz ere Noaineko gasolindegian egin dugu eta Formigalerainantz abiatu gara zerua pixkanaka gero eta ilunago zegoela. Gauzak prestatu eta Espelunciechako amildegitik goiti igotzen hasi gara eski pistak jarraituz.
Garai ona da eski pistetatik igotzeko. Elurra zapaldu gabe eta mendi-eskizaleak bakarrik inguruan. Pistak irekitzen dituztenean bertze kontu bat izanen da.
11:17 : Puerto de Canal Roya (2143m)
Lepoaren inguruan eski pistak utzi eta hegoalderantz biratu gara elur malda politetik.
Espelunciecha mendien ingurura jo dugu zonalde lauago batetik.
Behin Espelunciecharen azpian kokatuta erabakia hartzeko momentua. Parean genuen iparraldeko korridoretik mendia igo edo etzanagoa de ekialdeko puntara segitu. Taldeko batzuk ez zuten argi ikusten korridorea jaisteko aukera eta beraz denek elkarrekin ekialdeko tontorrerantz segitu dugu. Itxura ederra zuen korridoerak eta baldintza onean zegoen!
Metro batzuk galdu Espelunciechako leporaino eta malda errazetatik irudiko tontorra zapaldu dugu.
12:10 : Espelunciecha Oriental (2247m)
Gailurrean haize hotza eta inguruak lainotuta. Transizioa egin eta berriz lepora itzuli gara han geldialdi luzeagoa egiteko.
Lepotik metro batzuk irabazi eta zuzenean iparraldeko maldetatik jaitsi gara pistetatik igo ordez.
Jaitsierako meomentu bat...
Elur nahiko ona harrapatu dugu, uste baino hobea egia erran.
Gozatzen...
13:47 : Formigal - Portalet aparkalekua (1750m)
Eta horrela akitu dugu esperantza handirik gabe hasitako eguna. Dagoen elur gutxiari zukua atera diogu behintzat!
Iruñeatik Jacara doan autobidea hartuko dugu. Behin Jacara iritsita Candanchu eta Astungo eski estazioetara igotzen den bidea hartuko dugu. Somporteko lepoan Astunera eskuin hartuko dugu.
KRONIKA:
Aurtengo eski denboraldia ere hasi dugu, nahiz eta elur gutxi dugu oro har Pirinioan. Webcamak eta Facebookeko argazki batzuk ikusita Astun aldera jo dugu gure elur gosea pixka bat baretzeko. Emaitza goiz pasa polita izan da lehen elur hautsez gozatuz...
10:00 : Astun (1730m)
Goizean goiz iratzargailua jarri eta Noainen hitzordua jarrita Astunerantz zuzendu gara. Trasteak prestatu eta lehen eguna izanda deus atzendu ez zaigula eta kontent abiatu gara oraindik itxita dauden eski pistetatik goiti.
Lehen orduetan zerua garbi izan dugu nahiz eta iragarpenek hodei gehiago izanen zela zioten. Elurra berriz, hautsa, primerakoa.
Batzuetan pistetatik eta bertzeetan pistaz kanpo, misterio handirik ez duen Raca mendira zuzendu gara.
Eski pistak itxita daudenean egiteko mendia da. Irekita badaude ez nuke gomendatuko...
Gibelean Moines eta Belonseiche inguruak, aitzineko irteeretatik ezagutzen ditugun bazterrak...
11:47 : La Raca (2278m)
Gailurrean iragarritako hodeiek egin digute ongi etorria, bistez ezin gozatu beraz...
Elurraz ordea anitz disfrutatu dugu lehen ateraldi honetan. Hautsa alde guzietatik.
13:15 : Astun (1730m)
Lehen kontaktua balekoa. Orain ea elur gehiago egiten duen...
Aiako Harrien zeharkaldia: II graduko eskaladatxo bat du Txurrumurru eta Erroilbideko kaskoen artean. Horrz gain, eskaladatxo gehiago ditu han eta hemen.
DENBORAK:
Elurretxe - Erlaitz Bidearen hasiera : Ordu bat
Erlaitz Bidea eskalatzea : Ordu bat eta erdi
Muganix - Erroilbide (gailurren zeharkaldia) : Ordu bat
Erroilbide - Elurretxe (GRtik itzulia eginez) : Ordu eta erdi
NOLA AILEGATU:
Elurretxera joateko Irunera hurbildu behar da. Bertan, Olaberria auzora joko dugu eta hemen seinaleen bidez ongi markatua dagoen bidea segituko dugu Elurretxeraino.
KRONIKA:
Txikitan amatxiren etxean egoten ginelarik atentzioa deitzen zidaten bi mendik. Bata Larrun zen, baina bertzea ezezaguna nuen. Punta anitz zituen mendigunea ikusgarri ageri zen (eta da) Lapurdiko kostatik. Aiako Harriak ziren.
Aurtengo uztailean hurbildu nintzen lehendabiziko aldiz ingurura, gailurren zeharkaldia egiteko asmoz. Orduko aldian, lainoak Erroilbiden buelta hartzera behartu ninduen. Hiru hilabete geroago mendi ikusgarri hauetara itzuli eta orduko arantzatxoa atera dut, Aiako Harrietara Erlaitz I deitzen den bidea eskalatuz igota.
10:18 : Elurretxe (502m)
Etxetik presarik gabe atera eta Elurretxeko aparkaleku betean lekua bilatuta, prestatu eta lepotik bertatik Aritxulegiko aterpe aldera doan bidea hartu genuen marka zuri, gorri eta horiak segituz.
Bide hau laster utzi behar da ordea Muganixeko espoloiaren azpiko aldera joateko, gurutze hau markatuta duen zuhaitz honen ondoan hain zuzen ere. Justu ateka bat baino metro batzuk lehenago dago zuhaitz hau.
Bidexkan goiti, laster bistaratu genuen Muganix, igoko genuen lehen gailurra, eta baita bere hego-mendebaldeko espoloia ere, eskalatuko genuena.
Aipatu bidexka ez dela batere nabaria eta zaila dela segitzeko momentu anitzetan. Basotxo honetan adibidez galdu egin genuen, eta GPSari esker aurkitu genuen berriz.
Basotik aterata, Donostia aldea ikusten hasi ginen. Ikaragarria da mendi hauen edertasuna eta zer erranik ez kosaldera dituen bistak.
Gauzak prestatu eta eskaldari ekin genion. Hona hemen luzeen xehetasunak:
1. luzea (4b, 25 metro): Luzearen hasieran dago pausurik zailena, baina erraz pasatzen da eta seguru anitz ditu. Ondore, pareta pixka bat etzaten da. Lehen bilera balkoitxo eroso batean dago kokatua.
2. luzea (4a, 25 metro): Lehen luzearen antzeko zailtasuna du. Zati bertikal baina helduleku anitz dituen batekin hasten da, gero pareta etzaten da eta azken zatian berriz pixka bat tentetzen da.
3. luzea (3b, 30 metro): Luze erraza, ia oinez egiteko modukoa. Eskalatzeko paretatxo bat bertzerik ez du gorosti baten ondoan.
Eskalada laburra egin zitzaigun eta jadanik irakurria nuen bezala, gehiago egiteko gogoz gelditu ginen. Muganixetik metro gutxi batzuetara akitzen da, Txingudiko badiarako begiratoki bikainean. Trasteak bildu eta gailurren zeharkaldiari ekinen genion.
12:56 : Muganix (758m)
Aiako Harrietako lehen gailurra zapaldu genuen minutu gutxian. Ia gelditu gabe aitzinera segituko genuen...
Bidexka nabarmena da momentu guzian. Jende anitz ibiltzen diren mendiak dira. Normala. Guk ere mendizale anitz harrapatu genuen hego haize goxoaz disfrutatzen.
Bidetik eskalatutako pareta begiratzen gelditu ginen momentu batean.
13:12 : Irumugarrieta (811m)
Oinez ailegatu ginen eguneko bigarren tontorrera eta hemen bai, gailurreko argazkia egiteko behintzat geldialditxoa egin genuen.
Irumugarrietatik aitzin hasten dira gailurren zeharkaldiko zailtasunak. I. graduko eskaladatxoak daude Txurrumurruko bidean...
Jaitsi beharreko paretatxo bat...
13:27 : Txurrumurru (828m)
Zailtasun handirik gabe harrapatu genuen hirugarrena ere...
Txurrumurru eta Erroilbide artean dago zeharkaldiko zatirik zailena. Lehenik, plaka batzuk jaitsi behar dira...
...eta jarraian Uztaiaren Pausua deitzen den zatia pasatu behar da. II. graduko pausua, zeharka gainditzen den pareta bat da, eta uztai bat dago jarrita punturik kritikoena gainditzen laguntzeko.
Pausua gaindituta Erroilbiderako genuen zatia begiratzen.
Bertze eskaladatxo batzuk egin behar dira, baina hauek aise errazagoak dira.
Txurrumurruko tontor ikusgarria gibelean utzi genuen. Hor daude kokatuta ibilbideko punturik zailenak.
Zoragarria Txurrumurruko koadroa, itsasertza gibelean duela... Ez dago urrun joan beharrik leku politak ezagutzeko.
Azken maldatxo batetik Aiako Harrietako tontorrik altuenera ailegatu ginen.
13:53 : Erroilbide (837m)
Hiru hilabete geroago berriz ere gailur honetan nintzen, baina oraingoan lainorik gabe eta ibilbide ikusgarria burututa. Poza handia zen beraz. Geldialdia egin genuen zerbait jan eta inguruaz gozatzeko.
Ondoren Aritxulegi aldera jaisten hasi ginen, uztailean igo nuen bidetik. Pasatutako tontor guziak begibistan genituen. Jaitsierako lehen zatian bidexka heze eta irristakorra pasatu behar da eta hor hartu genituen ipurdikorik handienak.
Ondoren bidexenda erosoagoa da. Erroilbide gibelean dotore!
Pinudi bat zeharkatzen...
Aiako Harrietara bista ederrak jaitsieran...
Hemen gailurrak zoomarekin. Ezker-ezkerrekoa da igo genuen pareta.
Bidegurutze honetan, Aritxulegira doan bidea utzi eta Elurretxera eramanen gintuen GRa hartu genuen, marka zuri, gorri eta horiak jarraituz.
15:39 : Elurretxe (502m)
GRak Aiako Harrien azpitik zeharkaldia egiten du eta zati hau luze samar egin zitzaidan trastez betetako motxila pisuaren ondorioz. Hala ere, kontent ailegatu ginen etxera, jarduera bikaina egin izanaren sentsazio goxoarekin!
