2013/05/11

Aspe (2645m)

EGUNA: 2013/05/11

IRTEERA: Rigüeloko aparkalekua, Aisa (1470m)

ZAILTASUNA:
- Alpinismo zailtasuna: PD-
- Eski zailtasuna: S3

DENBORAK:
- Igoera: 3 ordu eta erdi
- Jaitsiera: Ordu bat

NOLA IRITSI: Iruñeatik Pirinioetako autobidean barrena Jaca aldera eginen dugu. Jacara ailegatu aitzinetik, Puente La Reina de Jaca herrian, ezkerretara hartuko dugu Hecho aldera doan errepidetik. Bide horretatik segiko dugu Aragües del Puertoko desbiazio ikusi arte eta jarraian Jasa herrikoa hartuko dugu. Jasa herritik pasatzen da Aisa herriraino doan errepidetxoa. Aisara ailegatu aitzinetik ezkerretara hartuko dugu Rigüeloko amildegian gora igotzen den bidean barrena eta bertatik segiko dugu burdinezko balengo batek bidea moztuko digun arte.

DESKRIBAPENA:
Aspalditik buruan nuen mendi hau eta duela hilabete inguru lainoagatik buelta eman ondotik itzulltzea erabakia nuen, ahal bazen eski denboraldia akitu aitzinetik. Hala, larunbaterako iragarrita zeuden baldintza onak aprobetxatuz eta lagun batzukin aspalditik aipatutako ateraldia egin bidenabar, Aisa aldera abiatu ginen gogotsu.

Gaua Rigüeloko aparkalekuan pasako genuen eta biharamunean seietan ernatuta gora abiatuko ginen.

7:20 : Rigüeloko aparkalekua (1470m).
Zakutik ateratzea dexente kostatu ondotik, nahi baino beranduxeago atera ginen azkenean balengo berdea zeharkatuta. Dena den ipar haizea iragarrita zegoen eta ez zirudien elurrak arazo handirik emanen zigunik. Pistatik gora minutu gutxitan Rigüeloko zirku ederra gure aitzinean genuen tontor zuriak zaindari zirela. Uste baino elur gehiago zegoen gainera.


Errekaren ondoan akitzen da pista.


Hortik elurretara ailegatu arte oraindik zatitxo bat gelditzen zen eskiak porteatuz.


Azkenean ordubete inguruz eskien zama bizkarrean eraman ondotik, hainbertze desiratutako elurretan.


Gure pozak gutti iraun zuen ordea. Enbudora iritsi ginenean elur gogorra zela eta eskiak berriz kendu eta kranpoiak jarri behar izan genituen. Igoeraren 3/4ak eskiak bizkarrean egin nituen azkenean.


Enbudoa eta berari jarraitzen dion malda tenteak dira eta desnibel handia igotzen da metro gutitan.


Behin malda horiek gaindituta eguzkiak eta malda goxoagoek pozalditxoa eman ziguten. Gogorrena egina zegoen! Zati honetan berriz eskiak jantzi nituen.



Gailurra begi bistan genuen jadanik.


Baina aitzinetik irudian ikusten den lepora ailegatu beharra zegoen.


11:19 : Brecha de Aspe (2425m).
Lepora iristean iparralderantz ikuspegi ederra ireki zitzaigun behelaino eta guzti. Zoragarri zegoen!


Oraindik ordea azken malda gelditzen zen gure helburura ailegatzeko, beraz denbora gehiegirik galdu gabe berriz gora. Hemendik aitzin malda berriz tentetzen da eta kutxilak autoan utzi nituenez berriz ere kranpoiak jantzi nituen.


11:49 : Sasigailurra (2599m).
Sasigailurrera iritsita azken maldatxoa bertzerik ez zitzaigun falta. Eskiak bertan utzi eta gora!


Azken metroak...


11:56 : Aspe (2645m).
Ez ginen nahi orduko ailegatu gailurrera, baina espektakuluak merezi zuen benetan. Berez, lehenago iristen da, baina kranpoi-eski transizioetan denbora anitz galdu genuen eta horretaz gain lasai igo ginen.


Gailurrean argazki besta hasi zen. Irudian ipar-ekialdeko ikuspegia Midi nagusi dela. Ondoan Arista de los Murcielagos ezagunaren bukaera ere ikusten da.


Igotako bidea lepoa eta sasigailurrarekin. Urrunean berriz Bisaurin.


Lescun inguruko mendiak lainotik salbu.


Eta hegoaldetik hasita lehen erregea Collarada. Horrek ere eskiada ederra omen dauka. Urrunago berriz Gavarnieko zirkuko menditzarrak, Infiernos, Vignemale...


Eta nola ez gu! Gora Moder Mendi Taldea!!!!!!

Gailurrean egonalditxo labur xamarra egin ondotik, beherakoari ekin genion. Elurra baldintza onetan harrapatzea zen asmoa, bai eskiatzeko eta baita oinez jaisteko ere. Eta primerakoa aurkitu genuen, gogorra hasieran eta udaberrikoa gero, dena eskiatzeko primerakoa. Hemen jaitsierako bideo txiki bat. Bertan Brecha de Aspetik elurra akitzen zen lekura arteko jaitsiera osoa dago. Igotzen 2 ordu pasatako zatia 9 minututan jaisten da eskiekin!


 Behin eskiak kenduta berriz ere Rigüeloko zirku ederraren beheko partean geunden. A ze parajea eta ze eguna!
Kotxera berriz porteoa genuen, nahiz eta motza izan. Gainera inguruaz gozatzen segitzen genuen.
Urko eta Javi. Hemendik Himalaiara!
Urkoren afiziorik handiena, mendia baino gehiago, eskiak eta eskiko botak porteatzen ibiltzea da. Jejeje.
Jadanik etxerako bidean autoa gelditu genuen Asperi azken argazki bat egiteko! A zer nolako mendi puska eta konpainia onean gainera!!! Bertze bat arte!

2013/05/05

Soum des Salettes (2976m)

EGUNA: 2013/05/05

IRTEERA: Piau Engaly eski estazioa (1850m)

ZAILTASUNA: Igoera (PD). Jaitsiera (S2).

DENBORAK: Igoera: 3 ordu. Jaitsiera: Ordu bat (Eskiekin, bertzela bi ordu).

NOLA IRITSI:
Euskal Herriko ipar partetik joanez gero, azkarrena Baionan A64 autopista hartu eta bertati joatea Saint Lary Soulango irteera hartu arte. Behin autopistatik aterata aipatutako herriraino iritsi beharko dugu. Saint Lary gurutzatu eta Aragnouet-Bielsa tunelera doan bidea segiko dugu. Bidean goazela, eskuinetara Piau Engaly eski estaziora igotzen den bidea hartu beharko dugu. Estazioaren goiko partean dauden aparkalekuetako batean utziko dugu autoa.
Euskal Herriko hegoaldetik joan nahi badugu ordea, hobe da Iruñeatik Jacara doan autobidea hartzea. Jacatik Huescara jarraitzen duen errepidea segiko dugu baina segidan Fiscal herri aldera desbideratuko gara. Fiscaletik Ainsara segiko dugu eta hemen iparraldera biratuko gara lehen aipatutako tuneleraino igoz Cinca ibaiaren ertzetik. Tunela zeharkatuta pixka bat jaitsi (6 km) eta Piau Engalyko bidea hartuko dugu.

DESKRIBAPENA:
Jadanik eski denboraldiaren bukaeran gauden honetan bi eguneko  zeharkalditxo polita diseinatu eta Bielsa-Saint Lary ingurura abiatu ginen gogotsu. Berez zeharkaldia larunbatean eta igandean egitekoa genuen, baina larunbatean abiatu eta igo beharreko bi lepoek ekialdeko orientazioa izaki elurra laister zopatu zen eta arriskutsua zela ikusirik buelta hartu genuen lehen lepoan. Bertze batean itzultzeko aitzakia badugu behintzat.

Hasierako arantzatxoa ordea, igandean egin genuen ateraldi ederrean atera ahal izan genuen.

7:27 : Piau Engaly (1850m).
Bielsan gaua pasa ondotik, bezperan baino lehenago ernatu ginen elurrak maiatzean transformazio azkarra duela ikusi eta sufrituta. Piau Engalyra hurbildu, gauzak prestatu eta gora abiatu ginen. Estazioaren gaineko aparkaleku batean utzi genuen autoa eta Badeteko bailara hartu genuen eski pista batetik jaitsita. Mouscades teleaulkiaren azpiko zatira jaitsi eta harantxoan gora abiatu ginen eguneko helburua bistan genuela. Eguzkia Port de Campbieil lepoaren ekialdeko maldak berotzen hasia zen jadanik.




Badet harantxoan metro batzu eginda  gure eskuinetara metroak irabazten hasi ginen Estargne eta Campbieilen paretatzarrak inguratuz. Elur-jauzi arriskuarekin hobe da haranetik segitzea eta gero biratzea Port de Campbieleko lepo aldera. Bitartean, ekialdetik lainoak etorri eta zerua tapatzen hasi ziren. Egun honetan ongi etorriak izan ziren elurraren transformazioa pare bat orduz gibelatu baitzen.



Gora egin ahala pasatu beharreko Port de Campbieil lepoa ikusten hasi ginen Soum des Salettes eta Lenquo de Capo mendien artean.



Gibelean igotako bailaratxoa eta Mechant eta Bugateteko pareta beldurgarriak.



Campbieilen beheko zatia erabat inguratu ondotik eskuinetara biratu eta mendebaldeko norabidean Port de Campieileko azken malda igo genuen.



9:30 : Port de Campbieil (2598m).
Lepora ailegatzean haize freskoak egin zigun ongi etorria. Ez zegoen han geldi egoteko girorik, beraz azken malda igotzeari ekin genion.



Aitzinetik hala ere Vignemale eta enparauen ikuspegi eder honekin gozatu genuen. Goian izanen genuen ikuspegiaren aperitibotxoa bertzerik ez zen hau.



Soum des Saletteseko azken malda itxura hau zeukan. Elur dexente eta gailur nahiko hurbil ikusten da. Hala ere, efektu optikoa bertzerik ez zen ia 400 metroko desnibela gainditu beharko baikenuen oraindik.



Denborarik galdu gabe bada metroa irabazten hasi ginen poliki-poliki. Lainoek ere atseden bat eman ziguten zati honetan eta haizea erabat gelditu zen. Atzera begirada lepo aldera Campbieil mendia laino tartean zegoela.



2800 metro inguruan ezkerreko foka-larrua hautsi eta eskiak utzi behar izan nituen. Dena den azken metroak oinez egin behar dira nahi eta nahi ez.



Gailurrera iristen...



10:44 : Soum des Salettes (2976m).
Hiru milako maila guttigatik ez gainditzea bertze mendi asko baino aise lasaiagoa izatea ekartzen du. Gailurrean egon ginen momentuan ez zegoen inor gehiago, nahiz eta gero bertze batzuk agertu.







Eguzkiak ere ongi etorria egin zigun eta ederki egoten zen bertan. Mendebaldean gailurreko ertz polita eta urrunean Vignemaleko mendizerra.



Añisclo, Monte Perdido, Cilindro de Marbore, Marbore, Torre, Casco eta Taillon mendiak bertzea bertze hegoaldean. Behean berriz Troumouseko zirkura igotzen den errepidea oraindik elurturik.



La Munia eta inguruko mendiak laino tartean gordeka zebiltzan. Hurbilago Gela eta Gerbats mendiak eta beraien elur malda bikaina. Eskiatzeko aproposak.



Ekialdean Aureko bailara. Zenbat aukera duen inguru honek. Nik uste ondoan 3000ko mendigune gehien dituen ingurua dela. 11 mendiguneetatik 5 Aragnouet-Bielsa tunelaren bi aldeetatik arras hurbil daude: Neouvielle, Ordesa-Monte Perdido, Bachimala, Posets eta La Munia.


Ipar mendebaldean Gedre herrira eramanen gintuen harana.


Iparraldean Neouvielleko erreserbako hiru mendirik enblematikoenak: ezkerretara Pic Long, erdin urrunago Neouvielle bera eta eskuinean Campbieil.



Gailurreko panorama argazki sesioa akitzeko.





Goitiko ikuspegiarekin gozatu ederra hartu eta gero beherakoari ekin genion. Gailurraren azpiko harresitxoa jaistean eskiatzaile kuadrila batekin gurutzatu ginen.


Harresitik behera elurra eskietaraino.


Jaitsieran ere inguruaz ederki gozatu genuen. Ardiden mendia urrunean.


Lehen metro horiek jaitsira eskiak jantzi nituen eta behera. Elurra denetarikoa: lehen zatitxoan hautsa, lepora iristeko gogorxeagoa, lepotik behera udaberriko elur goxo-goxoa eta azken zatian kaka zaharra. Bi eskiatzaile Gela mendiari begira azken zatian.


Soum des Salettes atzean jadanik...


Jaitsitako azken malda harrizko harresiaren arteko maldatik.


Eta honaino ailegatu zen eguneko jaitsiera, askotan bezala erreka bateraino.



13:18 : Piau Engaly (1850m).
Azken metroak eski pista batetik egin genituen garai honetan hutsik eta abandonatuta dagoen Piau Engaly ingurura.